經過國際賽期後，沙特職戰火重燃，今晚東網直播頭場好戲碼，伊蒂哈德主場鬥艾哈森。雖然伊蒂哈德睇落近況麻麻，但單計主場戰績仍然有一定保證，相反艾哈森作客差到痹，隨時半場都頂唔住，既然主勝太熱冇乜肉食，轉吼半場主勝一樣咁穩陣。
（on.cc東網周六凌晨零時15分直播）文:法達斯維
主場例先發制人 伊蒂哈德半Ｗ夠決森
伊蒂哈德貴為上季聯賽盟主，但今季成績滑落之餘，季中仲同王牌賓施馬反晒面，呢位法國箭頭即時「跳船」去希拉爾，都咪話唔傷。單睇各項賽事近6仗，伊蒂哈德法定時間贏得1場咁大把，上仗沙王盃更互射12碼輸畀艾科魯特，確係幾肉酸。不過留意番上述6仗有5場屬作客，佢哋始終爛船仲有三斤釘，齋計主場近5仗全勝，其中4次上半場就取得領先，由頭贏到尾，可見主場仍有一定威力。
艾哈森作客走樣
另邊廂，艾哈森狀態睇落唔太差，各項賽事近6仗獲3勝1和2負，但3場勝仗都係來自主場，呢班波離開地頭立即走晒樣，近6仗作客只得2和4負，見到都唔開胃。何況伊蒂哈德就算走咗賓施馬同尼高路簡迪，目前仲有艾奧亞、法賓奴泰華利斯及貝雲積等球星擔大旗，實力一啲都唔失禮，主場力求反彈決心十足，可望恃質先發制人，半場主勝有計。