世盃D組聽日有「午餐波」，澳洲同土耳其正面交鋒。呢一組4支球隊實力平均，不過以歐洲代表土耳其戰鬥力較高，佢哋喺世盃前狀態登上高峰，近期熱身賽表現非常對辦，要贏實力平庸嘅澳洲難度不大，客勝可取。(Now 618及616周日中午12時直播)文:工廠仔
土耳其近年進步神速，以艾達古拿、基倫耶迪斯為首嘅新生代，2年前喺歐國盃殺入8強已經嶄露頭角，加上查漢奴古、艾度路高奴等主力都處於當打之齡，將會係今屆世盃其中一支不可忽視嘅力量。
蒙迪拿勝率6成以上
意大利籍領隊蒙迪拿3年前領軍後，土耳其勝率有6成以上，近8場賽事豪取7勝1和，包括今年4場熱身賽全部贏晒，喺世盃外亦曾經同西班牙打成平手，依家信心爆棚，相信可以「遇神殺神」。
澳洲整體實力有限，出線決賽周後喺美國踢5場熱身賽只有1和4負，對住美國、哥倫比亞同墨西哥3支決賽周球隊都輸波，主力射手穆哈密托尼喺上場熱身賽受傷，缺席賽前練習，今場上陣成疑，對住大勇嘅土耳其，似乎凶多吉少。