今晚法甲上演前列大戰，由班霸巴黎聖日耳門（PSG）主場硬撼里昂。PSG雖然喺聯賽大超班，但奧士文尼迪比利等多名主力因傷倦勤，加上近年碰頭都係險勝1粒居多，讓球主客和要讓2球咁辣，寧捧受讓嘅里昂讓球勝（+2）。（Now 643周二凌晨3時30分直播）文:法達斯維
PSG今季多災多難，捱過開局不利後，原本漸入佳境，點知上周中歐聯以4比2擊敗「地上最強」巴塞隆拿，卻付出沉重代價，王牌奧士文尼迪比利、翼鋒基華拉斯基利亞（KK）及守將馬昆奴斯哥利亞先後傷出，KK更加證實斷十字韌帶，基本上提早收咧，連同未好番嘅左閘紐奴文迪斯，呢4位主力今仗肯定冇份，認真大鑊。
里昂防守有料到
另邊廂，里昂今季7輪聯賽獲4勝2和僅1敗，依家同PSG同得14分，唔單止入球能力拍得住PSG，而且僅失5粒，係今季聯賽失波最少球隊之一，絕對有力一戰。
翻查紀錄，雙方各項賽事近5次正面交鋒，雖然PSG取得4勝1負，但只有1次贏2球或以上，其餘3場勝仗係險勝1粒，可見每逢交手都咬得好緊，預計PSG恃質頂盡贏1粒，甚至未必贏到，讓球主客和里昂受讓2球咁筍，讓球客勝（+2）必撐。