沙職爭霸愈演愈烈，艾納斯同希拉爾由場內鬥到場外，艾納斯今晚凌晨主場鬥伊蒂哈德，為保冠軍夢不容有失。艾納斯近日爆出C朗拿度罷踢風波，不過對手伊蒂哈德都唔好得幾多，轉會窗慘被拆骨，星光熠熠嘅艾納斯夠力延續勝勢，直取主勝。
（on.cc東網周六凌晨1時30分直播）
沙職近日爆發大地震，艾納斯不滿「老闆」PIF將資源畀晒希拉爾，C朗上場更罷踢抗議，引起極大回響。不過艾納斯始終質素高，上場作客照贏艾利雅德，聯賽錄得5連勝，完全洗脫年初3連敗頹勢，就算C朗事件持續，沙迪奧文尼、祖奧菲歷斯都夠Quali擔大旗。
事實上，艾納斯除咗新年前後嗰半個月離奇跌Watt之外，全季表現其實都極之穩定，開季仲曾經豪取10連勝，近期亦取得5連勝，攻守表現都相當對辦，最近3場都保持不失。艾納斯球員表現明顯冇受到場外風波影響，為追趕希拉爾戰意更高昂，主場出擊信心十足。
伊蒂哈德星散狀態曳
伊蒂哈德亦係呢次「偏心希拉爾」事件嘅受害者，王牌前鋒賓施馬上場罷踢後，轉會窗關閉前已轉會希拉爾，加上法國中場尼高路簡迪亦離隊，作為PIF旗下4大球會之一，伊蒂哈德竟落得「星散」下場。伊蒂哈德近6聯賽，只係贏過包尾2隊，今場作客凶多吉少。